Gres (Vila de Cruces), 13 de outubro de 2023.-

Un ano máis, con motivo do Día das Escritoras, a Fundación Xosé Neira Vilas rende homenaxe a Anisia Miranda, unha das fundadoras desta entidade e primeira vicepresidenta da mesma. A fundación únese deste xeito á iniciativa da Biblioteca Nacional, de maneira que o 16 de outubro terá lugar unha ofrenda floral no cemiterio de Gres, acompañada da lectura pública de diversos textos literarios, tanto da propia Anisia Miranda como doutras escritoras, incluíndo neste último caso as propostas polas Bibliotecas Escolares de Galicia, como tamén pola Biblioteca Nacional. Haberá así ocasión de escoitar textos escritos nas catro linguas do Estado.

Está confirmada a presenza de Anxo Lorenzo, director xeral de Cultura da Xunta de Galicia.

Nesta edición do Día das Escritoras, a Biblioteca Nacional propón unha celebración da escritura dende a expresión do gozo, a ledicia e a risa, que tantas veces ten sido motivo de tabú para mulleres educadas na abnegación, o comedimento e o silencio.

Entre a obra diversa de Anisia Miranda, destaca o libro de divulgación Mitos e lendas da vella Grecia, que foi reeditado este ano pola Editorial Galaxia, e que orixinariamente fora publicado pola Editora Juvenil cubana en 1966