ESQUERDA UNIDA TRASLADA AO MINISTERIO DE TRANSICIÓN ECOLÓXICA A SITUACIÓN DA RÍA DO BURGO E A NECESIDADE DE QUE OS VINDEIROS ORZAMENTOS CONTEMPLEN A LIMPEZA INTEGRAL DA RÍA

  

Tras denunciar publicamente a vertedura de áridos do que deu conta ás autoridades a Asociación Ecoloxista ADEGA o pasado 11 de xullo, Esquerda Unida vén de poñerse en contacto co Goberno Central para explicar a situación da ría do Burgo e solicitar tanto a investigación dos feitos coma a inclusión dunha partida específica para a limpeza da ría do Burgo nos vindeiros orzamentos xerais do Estado.

(Compostela, 1 de outubro de 2020) En xullo de 2020 a Asociación Ecoloxista Adega poñía en coñecemento das autoridades unha vertedura acontecido o día 11 ao pé do Paraugas do Temple, entre a ponte medieval e a estrada AC211. A pesar diso non se coñeceron actuacións por parte da Garda Civil, administración ante a que foi presentada a denuncia. Tampouco se ten coñecemento de actuacións por parte da Subdelegada do Goberno, que foi informada da denuncia e que mantivo unha xuntanza co Concello o pasado 20 de xullo, sen que transcendera o contido da mesma.

Esquerda Unida manifesta a súa preocupación por esta situación, xa que a non asunción de medidas conlevaría un importante prexuízo para unha ría que leva soportando durante décadas o abandono institucional. A ría do Burgo experimenta unha grave afectación desde o inicio da edificación salvaxe con obras que afectaron ás súas correntes e ao seu leito, pero tamén pola realización de todo tipo de vertedura, que produciron un deterioro acelerado da calidade das aguas coa conseguinte desaparición da súa flora e fauna, poñendo en risco o ecosistema e moitos postos de traballo.

Por outra banda, Esquerda Unida denuncia a actitude perniciosa do Concello de Cambre apoiando mediante declaracións en pleno e nos medios de comunicación, verteduras incontroladas de áridos como o que aconteceu este verán.

Por este motivo Esquerda Unida vén de poñerse en contacto co Ministerio de Transición Ecolóxica para informar de esta situación, agardando a investigación e medidas pertinentes no caso puntual do pasado mes de xullo, pero tamén defendendo a necesidade de que os vindeiros orzamentos conten cunha partida que permita comezar a rexenerar definitivamente a Ría do Burgo.