Información
Ourense

Baltar asina o decreto de convocatoria do pleno do "Debate sobre o estado da provincia"

Información
23 Octubre 2018 488 votos
1 1 1 1 1 1 1 1 1 1

Ourense, 22 de outubro de 2018.- O presidente da Deputación de Ourense, Manuel Baltar, asinou hoxe o decreto de convocatoria para a celebración da sesión plenaria extraordinaria que terá como único punto da orde do día o "Debate sobre estado da provincia de Ourense" correspondente ao ano 2018, que a Corporación Provincial celebrará o vindeiro 6 de novembro, ás 10.00 horas, no Salón de Plenos do Pazo Provincial. Os grupos políticos teñen de prazo ata o 31 de outubro para presentar as propostas de resolución que se presentarán no plenario.

 

Este será o cuarto debate sobre o estado da provincia, tralos celebrados en 2014, 2016 e 2017 –en 2015 non se celebrou por coincidir en período pre-electoral-, sendo a Deputación de Ourense o primeiro goberno provincial de Galicia e un dos primeiros de España en realizar un debate destas características.

Esta iniciativa, contemplada no Código Ético e de Conduta da institución provincial, "incide no compromiso de goberno aberto e transparencia coa cidadanía da Deputación de Ourense, por medio dun debate plenario para analizar a situación actual da provincia de Ourense e os proxectos e propostas que os grupos políticos na corporación provincial teñen para a nosa provincia", afirma Manuel Baltar.

No pleno do debate, cada grupo político poderá formular ata un máximo de 10 propostas de resolución. O debate abrirase cunha intervención da Presidencia por un tempo máximo de 30 minutos, e a continuación, cada grupo político disporá de 15 minutos de intervención para a formulación de réplica á intervención do presidente e defensa das propostas de resolución presentadas.

A orde de intervención dos grupos estará determinada polo número de deputados cos que conten, intervindo en primeiro lugar o Grupo do BNG, seguido do Grupo de Democracia Ourensana, do Grupo Socialista e do Grupo Popular. Concluídas as intervencións dos grupos suspenderase o pleno por espazo de 30 minutos, durante os cales os portavoces poderán reunirse para negociar os posibles acordos respecto das propostas de resolución.

O Pleno continuará cunha quenda de dúplica do presidente por un tempo máximo de 10 minutos, á que seguirá unha quenda de redúplica dos grupos políticos por un tempo máximo de 5 minutos cada un, coa mesma orde de intervención que a quenda de réplica. O debate pecharase cunha intervención do presidente por un tempo máximo de 5 minutos, e unha vez concluído o debate procederase á votación individual das propostas de resolución presentadas, incluíndo as emendas que se acordasen ao respecto.

O debate sobre o "Estado da Provincia", como acontece cos plenos ordinarios, será retransmitido en directo a través da páxina web da Deputación de Ourense, para que poida ser seguido pola cidadanía desde calquera localización.

Otros articulos relacionados.....