Información
Elecciones municipales de Galicia

Sánchez Bugallo asegura que o 27 de maio Santiago terá un goberno progresista, comprometido coas persoas

Información
01 Mayo 2019 488 votos
1 1 1 1 1 1 1 1 1 1

O candidato á alcaldía sinala: “a cidadanía de España, Galicia e Santiago, saben que, cando as liberdades e os dereitos dos traballadores e das persoas están ameazados o Partido Socialista é unha garantía”.


Santiago de Compostela, 1 de maio de 2019

A candidatura de Sánchez Bugallo participou hoxe na ofrenda floral a Pablo Iglesias, fundador do PSOE e na manifestación do Primeiro de Maio, Día dos Traballadores. Durante a ofrenda, o candidato á alcaldía sinalou que o 27 de maio, Santiago terá un goberno progresista, “comprometido con Galicia, comprometido coas persoas, cos máis desfavorecidos, comprometido coa muller, coas persoas dependentes e coa creación de emprego”. Para o candidato, “a maior inxustiza que temos é que os nosos fillos, os nosos netos, se formen aquí, e unha vez formados teñan que coller a maletiña e ir buscar a vida a outro país e a outro territorio”.


Asegura Bugallo que “nós queremos facer unha política progresista de verdade, con feitos e realidade, e non só con palabras. Xustamente por iso mantemos unha posición crítica co goberno actual.” Argumenta que se non, a cidadanía non o entendería, “entendería que había unha conivencia, unha complicidade ou incluso un compromiso cunha realidade política que consiste en falar moito, en dicir que farei moito, e non facer absolutamente nada, de aquelo que se di”. Precisamos, di, “transmitirlles aos cidadáns a realidade”.


Mañá, dous de maio, recorda Bugallo, o PSOE cumpre 140 anos. “É o partido máis antigo de España, é o único, xunto ao PNV, que sobrevive do século XIX”. A clave desta supervivencia, explica, son dúas cousas: a primeira “a súa capacidade de adaptarse ás necesidades dos tempos”; e a segunda, “a busca e compromiso permanente con dous conceptos, a liberdade e a igualdade”.


Para o candidato á alcaldía, é posible que o Partido Socialista chegue ao século XXII, porque “cada vez que algúns se esforzan por enterralo, e comezan a botarnos palas de terra enriba, rexurde con máis forza”. A clave, segundo Bugallo é porque  responde ás necesidades da sociedade: “porque a cidadanía de España, Galicia e Santiago, saben que, cando as liberdades e os dereitos dos traballadores e das persoas están ameazados o Partido Socialista é unha garantía”.


Recorda Bugallo que os socialistas trouxeron a España a Lei Xeral de Sanidade, a xornada de oito horas, o voto da muller, “tantas e tantas cousas, que hoxe outros se pretenden arrogar, e incluso nos dan leccións; pero quen as sacou adiante no Parlamento, foi o Partido Socialista”. Porque segundo sinala, o PSOE é un “partido de palabras, pero sobre todo de feitos, de realidade, e de transformacións”.


Referíndose á vitoria socialista nas eleccións xerais, o candidato á alcaldía de Santiago subliña: “que o nacionalismo, e determinados sentimentos, non nos impidan ver aquelo que nos une”. E engade, “esperamos construír lazos de unión entre todos os territorios e entre todos os traballadores”.


Para Bugallo “temos serias ameazas no horizonte”, e cita as pensións, “un dereito histórico”. Hoxe engade “todos respiramos tranquilos. Sabemos que imos seguir vivindo nun país libre. Un país que traballe para protexer aos máis débiles, un país que busque a igualdade e o equilibrio entre os diferentes territorios que o compoñen”. Para o candidato á alcaldía ábrese un escenario “incerto en algúns aspectos, seguramente complicado de xestionar. Pero, engade, “é un escenario de esperanza e de confianza”.