Suma e segue: publicanse os convenios da Consellaría de Presidencia coa prensa escrita no DOG do 27 de xuño por valor de 317.000€

Con algo de atraso, con bastante en realidade, publicanse no DOG os convenios da Vicepresidencia e Consellería de Presidencia, Administracións Públicas e Xustiza coa prensa escrita. Os convenios foron asinados a finais do ano pasado, salvo o da Voz de Galicia (en marzo deste ano) e aínda veñen de publicarse agora. Curiosa coma sempre a motivación do convenio para a difusión das actividades desta consellería de interese para a cidadanía, durante o ano 2017.

Seguense utilizando os convenios como se fosen contratos de publicidade institucional onde non hai realmente unha colaboración senón simplemente pagar por que se publiquen "actividades das consellarías" ou o que toda a vida se chamou publicidade institucional ou campañas de autobombo. O problema: facelo con cartos públicos nun contexto de fortes recortes sostidos sobre os servizos públicos. O curioso é que mentres se gastan cartos en publicidade, as listas de agarda seguen crecendo como denunciaban recentemente desde o GC: "Non hai diñeiro para os alugueiros sociais e si para propaganda sobre a vivenda"

A Xunta aumenta en 500.000€ a axuda a medios privados para que sexan "máis plurais e independientes"

 

Serán 1.675.000 € os que de partida destinará o Goberno galego a subvencionar o funcionamento das empresas xornalísticas e de radiodifusión privadas e que, ano tras ano, recaen nos grupos de sempre.

 

A convocatoria destas subvencións de concorrencia non competitiva foi publicada no DOG do 3 de maio. A gran diferenza respecto ao ano pasado son 540.000€ de orzamento que aumentan de inicio. Ben é certo que nos anos anteriores esta dispoisicón incial de 1.135.000€ sempre chegaba aos 1.675.000 cunha máxica ampliación de crédito poucos meses despois.

 

O curioso é a motivación desta subvención sen concurrencia competitiva nos tempos que corren: a liberdade de expresión e fomentar uns medios "máis plurais e independentes". Para mexar e non botar gota. Por suposto, e como todos os anos, seguindo coa fina ironía da convocatoria, tamén se busca a potenciación da lingua e cultura galega, "a galeguidade". 

 

Precisamente unhas axudas que van aos grandes grupos de sempre, de sobra coñecidos, entre outras, por usar o galego de xeito residual. Aquí a pasta que se lle outorga a cada grupo é directamente proporcional á difusión destes, ou sexa que canto máis grandes, máis reciben e así se fomenta a pluralidade...

 

Logo fican os convenios das distintas consellarías e os contratos de publicidade institucional por onde se van millóns de euros sen unha utilidade real para a cidadanía que poderían ser destinados a menos propaganda a favor do Goberno e maior calidade dos servizos públicos.

 

Máis diñeiro público para comprar a prensa: 549.000€

 

No DOG do 7 de xuño publícanse os convenios de colaboración subscritos pola Consellaría de Cultura e Educación no primeiro cuadrimestre do ano 2017.

Entre estes destacan, polo seu orixinal motivo para comprar titulares, os do "fomento da lectura da prensa escrita" nos centros docentes galegos ou os destinados a "potenciar o uso do idioma galego" nos principais rotativos galegos. Orixinais porque no primeiro caso máis que fomento da lectura, trátase de comprarlle xornais a determinadas editoriais e iso máis que convenio é un contrato de subscrición. E orixinal no segundo caso porque xa sabemos como potencian o uso do idioma galego a maioría dos xornais que se editan no noso país. En total, 549.000 €.

 

 

Xa non é novidade quen se leva a maior parte: La Voz de Galicia, polos dous tipos de convenios, un total de 297.850€. O resto para as outras editoriais de toda a vida: Faro de Vigo, S.A.U. , El Progreso de Lugo, S.L., La Región, S.A., Editorial Compostela, S.A, Editorial La Capital, S.L. e Rías Baixas de Comunicación, S.A 

 

Convenios de colaboración para comprar xornais para os centros educativos

Canto menos curioso é o apelativo que merecen estes convenios de colaboración onde unha Administración pon cartos e a outra parte conveniante comprométese a colocar un número determinado de xornais nos centros docentes galegos. Isto presuntamente semella un contrato de compraventa malamente disfrazado de "fomento da lectura da prensa escrita polo alumnado dos centros docentes". Custo: 325.374,56 €

E por que non destinar eses cartos directamente aos centros docentes públicos para que compren as publicacións e as novas tecnoloxías que precisen? Non sería esa un mellor xeito de fomentar a lectura? 

“Potenciar o galego”

En canto a segunda tipoloxía, a dos convenios para "promover e potenciar o galego" a través das xornais galegos pouco comentario merece pois brilla por  anedótica a presencia da nosa lingüa neses medios. Custo: 224.359,00 €

Na teoría se lles esixe que cedan á lingua propia un 8% do seu espazo total, que en moitas ocasión non se cumpre, xa que algúns deles nin superan o 5%. Espazos que, xeralmente, son os mesmos en todos os medios: cultura e opinión, principalmente. Algúns medios, como é o caso de La Voz, xustifican o uso do galego utilizando algunha declaración dalgunha persoa en galego nunha noticia que está en español.

 

Sexa cunha xustificación ou con outra, o caso é ter contentos aos medios de sempre, aos que chegan a maior parte da poboación, non vaia ser que publiquen críticas ao Goberno como por exemplo gastar máis de medio millón de euros en convenios como estes e logo andar dicindo que non hai cartos e que hai que recortar en sanidade, servizos sociais ou educación.