Foto de grupo dos rapaces e rapazas da última quenda do Verán Campus USC
Con decisión, sen deixarse impresionar por tan insigne espazo, sentaban nas cadeiras do Salón Reitoral do Colexio de San Xerome os rapaces e rapazas que están a participar no programa de conciliación Verán Campus da USC.
Alí recibíaos o reitor Juan Viaño, a quen logo de explicar o funcionamento da universidade lle sorprendía un rapaz coa pregunta “¿para ser reitor hai que ser relixioso?”. Unha vez aclarada a laicidade actual da institución, que algúns aplaudían, sucedéronse moitas outras cuestións sobre o propio cargo de reitor. Dende que hai que facer para selo ata se é difícil o seu desempeño ou se traballa todos os días da semana.
Tamén mostraron curiosidade pola duración das carreiras, as notas e acceso e as carreiras “ que duran menos”.
A maioría do grupo, nenos e nenas de entre 8 e 13 anos, confesou querer estudar unha carreira universitaria. Gañaron Informática e Física, pero tamén soaron como desexos de futuro farmacia, robótica, química, matemáticas, historia, bioloxía, astronomía, maxisterio, cinematografía, medicina e xornalismo.
Estes rapaces e rapazas, xunto a outros de idades inferiores, conforman a última quenda do programa Verán Campus USC, que vai xa pola súa oitava edición organizado pola Fundación USC Deportiva coa colaboración do Concello de Santiago. Na visita estiveron acompañados do director do programa universitario, Diego Vilas, e do xerente das Fundación USC Deportiva, Óscar Hermida.
