“Resulta repugnante que pretendan sacar rédito político inventándose historias que desprestixian aos nosos traballadores”, afirma
O alcalde de Ponte Caldelas, Andrés Díaz Sobral, invitou ao PP a cesar na súa campaña de acoso e derrubo contra os funcionarios municipais. Hai un par de días presentaron un escrito por Rexistro para protestar formalmente por un erro subsanable na notificación do Pleno, cometido por unha funcionaria municipal, e hoxe sorpréndenos cunha “película de medo” sobre unha suposta desidia no mantemento das instalacións de abastecemento de auga.
Andrés Díaz invita aos concelleiros do PP a cesar nesta repugnante campaña de cuestionamento da profesionalidade dos traballadores municipais. Non é admisible que a partir dunha simple rotura dunha tubería inventen acusacións sobre un suposto mantemento defectuoso do bombeo do río, cando saben que funciona perfectamente. E que digan que Ponte Caldelas estivo “tres días case sen auga”, cando a avaría só afectou a 20 vivendas da parte superior da Vila e o servizo viuse interrompido unicamente entre as 11 da noite do sábado e as 11 da mañá do domingo.
O alcalde quere felicitar expresamente aos membros da brigada de Obras municipal polo eficiente traballo realizado neste e noutros casos. Os operarios erguéronse de madrugada e repararon a averia en tempo récord. Tanto é así que no Concello non se recibiu ningunha queixa.
Díaz invita ao grupo municipal do PP a cesar nesta campaña de manipulación e mentiras, como por exemplo cando afirman que o suposto corte de auga debeuse ao defectuoso mantemento do bombeo do río, cando esa instalación está perfectamente e, de feito, utilízase cada vez que a escaseza dos mananciais obriga a elo.
“Un día pretenden suspender un Pleno aproveitándose dun erro administrativo dunha funcionaria, aos poucos días insinúan defectos no mantemento de instalacións que compete á brigada de Obras; como alcalde sinto vergoña allea”, afirma Andrés Díaz, quen conclúe que “resulta repugnante que haxa quen pretenda sacar rédito político desprestixiando, sen escrúpulos, aos nosos traballadores”, eu como Alcalde e todo o equipo de Goberno felicitámolos polo impresionante traballo e dedicación que están tendo.
