A sección terceira da Sala do Contencioso-administrativo do Tribunal Superior de Xustiza de Galicia (TSXG) expuxo unha tripla cuestión prexudicial ao Tribunal de Xustiza da Unión Europea (TXUE) para que determine se a Xunta debeu poñer ao dispor do público interesado (non só dos promotores) os informes sectoriais sobre parques eólicos para que puidese, no seu caso, formular alegacións e participar no proceso de toma de decisión sobre as autorizacións dos proxectos antes de que se aprobaran. Eses informes sectoriais conteñen información sobre materia forestal, de augas, de patrimonio natural e cultural, de turismo, de saúde, de enerxía eléctrica e de seguridade aérea, entre outros.
A Sala acordou suspender, á espera de que se resolva a cuestión prexudicial, o litixio no que deberá decidir sobre a legalidade ou non da resolución da Xunta na que outorgou a Eurus Desarrollos Renovables as autorizacións administrativas previa e de construción do parque eólico A Raña III, situado no termo municipal de Mazaricos (A Coruña).
O alto tribunal galego indica no auto remitido ao TXUE que para tomar unha decisión sobre o asunto que lle expoñen “resulta relevante decidir se a normativa interna (estatal e autonómica) se axusta ao mandato do artigo 6.3 da Directiva 2011/92/UE do Parlamento Europeo e do Consello, do 13 de decembro de 2011, relativa á avaliación das repercusións de determinados proxectos públicos e privados sobre o medio ambiente, no que concirne á necesidade de que a Administración interveniente ofreza aos interesados un trámite de audiencia despois da emisión dos informes sectoriais”.
Os maxistrados explican que un dos motivos de nulidade que esgrime a parte demandante -a asociación ecoloxista Petón do Lobo- foi o razoado na sentenza do TSXG do 14 de xaneiro de 2022 (PO 7419/2020), que analizou un asunto no que, do mesmo xeito que sucedeu no presente caso, non se ofreceu un trámite de audiencia aos interesados tras a emisión dos informes sectoriais dun parque eólico, o que motivou a anulación da resolución que autorizou a execución e explotación das instalacións. Esa sentenza do TSXG, con todo, foi revogada polo Tribunal Supremo nun fallo do 21 de decembro de 2023 (recurso de casación 3303/2022).
O TSXG, segundo sinala no auto, entende que o artigo 6 da Directiva 2011/92/UE obriga aos órganos que resolven solicitudes de autorizacións con efectos ambientais a realizar previamente tres trámites: os dous primeiros -sobre os cales non se fixa unha orde temporal- son: outorgar audiencia ao público en xeral sobre o proxecto e solicitar os informes sectoriais dos órganos competentes en diversas materias; e, o terceiro, realizaríase con posterioridade, pois consiste en trasladar os principais informes sectoriais aos interesados (que non é só o promotor) para que poidan formular alegacións antes da toma de decisión.
“Por esa razón, entende este órgano xudicial que os artigos 36, 37 e 38 da Lei estatal 21/2013, e 33 e 34 da Lei autonómica galega 8/2009, poderían non traspoñer adecuadamente o esixido no artigo 6.3 da Directiva 2011/92/UE, na medida en que, aínda que outorgan audiencia ao promotor tras os trámites de información pública e obtención dos informes sectoriais, privan aos interesados, que se definen no seu artigo 1.2.e), do seu dereito a formular as alegacións con anterioridade a que a autoridade competente adopte a decisión sobre a solicitude de autorización do proxecto (artigo 6.4 desa directiva)”.
En concreto, os maxistrados solicitan ao TXUE que aclare o significado da expresión de “principais informes e ditames” a que se refire o artigo 6.3 da Directiva 2011/92/UE, relativa á avaliación das repercusións de determinados proxectos públicos e privados sobre o medio ambiente; así como que especifique se os informes a que se refire o artigo 37.2 da Lei 21/2013, que debe solicitar o órgano substantivo, son os que se recollen no artigo 6.3 da Directiva 2011/92/UE; e, por último, demanda que aclare se os artigos 36, 37 e 38 da Lei estatal 21/2013 e 33 e 34 da Lei autonómica galega 8/2009 se opoñen á esixencia que impón o artigo 6.3 da Directiva 2011/92/UE de garantir que se poñan ao dispor do público interesado os principais informes sectoriais que se emitiron, ao obxecto de que poida formular as súas alegacións e participar, dentro dun prazo non inferior a 30 días, no proceso da toma de decisión sobre a solicitude de autorización do proxecto, antes de que aquela se adoptara.
