Información
Galicia

Patricia Vilán acusa a Feijóo de “utilizar as institucións coma a salita da súa casa”, logo de que o Supremo veña de ratificar a sentenza do TSXG contra Milagros Otero

Información
03 Abril 2019 236 votos
4.5 1 1 1 1 1 1 1 1 1 1 Rating 90%

A portavoz de Xustiza do Grupo socialista, Patricia Vilán, urxiu hoxe ao presidente da Xunta que retire á Valedora do Pobo. Vilán amosoulle a porta de saída á Valedora, Milagros Otero, logo de que o Tribunal Supremo rexeitara o recurso de casación que presentou contra a sentenza do Tribunal Superior de Xustiza de Galicia decretando “arbitrariedade” e “desviación de poder” por facerlle un posto á medida da irmá do portavoz do PP.

 

A parlamentaria socialista advertiu do “dano enorme, irreparable” á institución por parte do PP e do presidente da Xunta que “foi quen decidiu que fora Otero a Valedora do Pobo”, e sinalou que “non poden utilizar ás institucións coma se foran a salita da súa casa”. Apuntou tamén á propia Comisionada, que “sabía de sobra que concorrían as condicións que lle estaban advertindo os tribunais e que están probadas”.

Vilán reivindicou o cese de Otero “o máis pronto posible”, xa que do contrario “dende o Grupo Socialista adoptaremos as medidas que consideremos oportunas” para “velar polo prestixio dunha institución” que “ten que estar por riba dos intereses do PP”.

Lembrou que os socialistas galegos xa reclamaron o cese da Valedora cando se coñeceu a sentenza do TSXG, pero que “non renunciou, e o PP mantívoa no seu posto a pesares de que perdera a confianza dos tres quintos da Cámara” que a elixiran. O Grupo Popular, lembrou, decidiu mantela daquela “agardando pola sentenza firme” que se vén de producir, xa que a decisión do Supremo esgota a vía xudicial.

A responsable socialista apelou á Lei do Valedor para acadar a “forma de cese” da responsable da Oficina do Valedor, aludindo a que determina como unha das causas o “notorio incumprimento das obrigas e deberes do seu cargo” (art. 5.1.4º). Sinala ademais que o cargo declararase vacante por decisión do Pleno do Parlamento “pola maioría establecida das tres quintas partes dos membros do Parlamento, mediante debate e logo de audiencia do interesado” (art. 5.2).

Otros articulos relacionados.....