- 
RSS.(+)
A Universidade Popular de Ourense bate un ano máis o seu récord de participación, unha vez pechado o proceso de matriculación en todas as accións formativas. Neste curso 2015-16 matriculáronse 2.701 persoas, con 3.314 pre-inscritos, fronte aos 2.577 do ano anterior. Cifras nunca acadadas na historia da Universidade Popular de Ourense, como vén sucedendo ano tras ano dende a súa creación, hai 21 anos. En total, foron 114 as actividades formativas que se impartiron neste curso, algunhas delas aínda en marcha.
Todos estes alumnos recibirán o seu diploma acreditativo o vindeiro 16 de xuño no Auditorio Municipal, nun acto ao que serán convocados todos os participantes nos cursos. Así mesmo, os alumnos terán a oportunidade de avaliar os cursos recibidos, de forma que a Concellería de Educación poida ter rexistros reais sobre os niveis de satisfacción dos alumnos e, ao mesmo tempo, peneirar as ofertas presentadas para o curso que vén.
O que está a rematar foi o primeiro no que a Concellería de Educación lle abriu á cidadanía a posibilidade de presentar as súas ofertas de formación, convocatoria que foi de grande éxito: Recolléronse un total de 452 de diferentes disciplinas e modalidades. Por segundo ano consecutivo, e cara ao curso 2016-17, a Concellería vén de aprobar as bases para a selección das actividades: O prazo estará aberto do 23 de maio ao 10 de xuño de 2016.
Por salientar algúns dos cursos máis demandados polos ourensáns este ano, están os de Inglés práctico elemental, Método Pilates , Ritmos latinos e roda cubana, Ximnasia hipopresiva, Tapas, pinchos e canapés, Fotografía, Poda e enxerta e Restauración de mobles antigos. Na modalidade de formación a distancia (a través da Internet), os cursos máis demandados foron os de Monitor/a de ludotecas, Cartografía dixital e Monitor/a de estimulación cognitiva coa terceira idade.
