O Convenio de Actuacións Musicais do Concello de Carballo para o ano 2016 contará este exercicio coa colaboración de 32 agrupacións musicais do termo municipal das cales 14 pertencen a asociacións culturais, xuvenís ou de veciños. O acto de sinatura, previsto para o xoves 12 de maio ás 19.30 horas, contará coa presenza do Alcalde de Carballo, Evencio Ferrero e dos distintos representantes das agrupacións musicais do municipio que se incribiron previamente nel. O Convenio ten por obxecto contribuír á promoción da música e do folclore que se desenvolve no noso Concello, difundir o labor que as agrupacións musicais de persoas afeccionadas realizan, así como colaborar coas diferentes entidades que ao longo do ano organizan diversos actos culturais en Carballo. 

O acto de sinatura do convenio terá lugar o xoves 12 de maio a partir das 19.30 horas no Pazo da Cultura

Con esta finalidade o Concello de Carballo establece este convenio específico de actuacións cos grupos musicais do municipio para que lles oferten as súas actuacións ás asociacións culturais, asociacións de veciños/as, comisións de festas ou outras entidades de carácter cultural ou social sen ánimo de lucro. As actuacións deben realizarse no termo municipal de Carballo e deberán ser públicas e gratuítas, e non poderán ser utilizadas en actos políticos, privados.

A maioría dos grupos son de música ou baile tradicional

Poderán solicitar actuacións das agrupacións asinantes deste Convenio as asociacións, comisións de festas ou outras entidades culturais e sociais sen ánimo de lucro que teñan o seu domicilio social en Carballo e que organicen e realicen actividades culturais que inclúan actuacións musicais. As entidades participantes clasificanse nas seguintes categorías:

• Grupos de música e danza tradicional (mínimo 12 compoñentes) - [7 grupos]
• Grupos de gaitas (mínimo 4 compoñentes) – [7 grupos]
• Grupos de cantareiras/os (mínimo 4 compoñentes) – [5 grupos]
• Masas corais (10-29 compoñentes) – [3 agrupacións]
• Masas corais (a partir de 30 compoñentes) – [4 agrupacións]
• Orquestras, conxuntos e bandas de música (mínimo 4 compoñentes) – [6 grupos]

O presuposto que se investirá neste Convenio Musical para o ano 2016 É de 21.850 euros, que se repartirán da seguinte maneira entre as distintas agrupacións por cada dúas actuacións realizadas:

• Grupos de música e danza tradicional (mínimo de 12 compoñentes), 350€
• Grupos de gaitas (mínimo de 4 compoñentes), 260€
• Grupos de cantareiras (mínimo de 4 compoñentes), 260€
• Masas corais (entre 10 e 29 compoñentes), 260€
• Masas corais(a partir de 30 compoñentes), 425€
• Orquestras, conxuntos e bandas de música (mínimo de 4 compoñentes), 350€

A solicitude de actuacións destas agrupación así como a xustificación da realización das mesmas están regulada no convenio a través dunhas disposicións que se darán a coñecer ás agrupacións participantes por escrito. O Concelleiro de Cultura, Marcos Trigo, que tamén asistirá ao acto de sinatura, será o encargado de explicarlles ás entidades o funcionamento do acordo.