No día de onte debateuse unha iniciativa do BNG no Parlamento Galego, en concreto na Comisión nº 4 de Educación e Cultura, que foi rexeitada polo voto en contra do Partido Popular. En concreto tratábase dunha Proposición Non de Lei (PNL) mediante a que o grupo parlamentar do BNG pretendía instar á Xunta de Galiza a garantir a continuidade da escola unitaria A Revoltiña de Soandres, que foi rexeitada co voto en contra do PP. Deste xeito, o grupo que apoia o goberno evitou comprometerse na defensa da continuidade desta escola rural, afirmando o seu portavoz que só estaría garantida a súa continuidade no vindeiro curso escolar se hai un mínimo de 6 matrículas formalizadas no mes de agosto cando se publiquen os datos de matriculacións.

Desde o BNG defendemos a continuidade desta escola, independentemente de que nun ano concreto non chegue ás 6 matrículas, pois entendemos que cómpre mirar o futuro máis alá do vindeiro curso para avaliar a súa viabilidade. Ademais , desde o goberno da Xunta vénse de anunciar de xeito propagandístico moitos cartos para investir no rural, para fixar poboación no medio rural, cando ao mesmo tempo están a pechar servizos tan necesarios como as escolas unitarias. Pois o que precisa o rural son feitos e non propaganda, precisa servizos para que a xente decida quedarse e non marchar para as vilas ou cidades. E precisa ademáis un maior compromiso na dotación de servizos complementarios nas escolas unitarias, servizos que son os que en moitas ocasións determinan que as nais e pais opten por levar as súas crianzas a un CEIP en vez de matriculalas na escola unitaria da súa parroquia.

Adxúntase o video do debate da PNL na Comisión 4ª do Parlamento:

http://www.parlamentodegalicia.es/axenda/intervencionsVideo.aspx?timecode=02:22:40&idvid=C3288035&duration=00:25:03&wmv=0000009916A-002-100kb.wmv&">http://www.parlamentodegalicia.es/axenda/intervencionsVideo.aspx?timecode=02:22:40&idvid=C3288035&duration=00:25:03&wmv=0000009916A-002-100kb.wmv&