Andrés Díaz denuncia a falta de respecto institucional da Xunta co Concello de Ponte Caldelas e o bloqueo ás obras da PO-234 Laxoso-Augasantas

Información
Galicia 22 Abril 2016 3316 votos - Registrate para votar

O alcalde de Ponte Caldelas, Andrés Díaz Sobral, denuncia publicamente a falta de colaboración da Xunta de Galicia para abordar un dos problemas que está a suscitar maior preocupación social no seu municipio, como é o pésimo estado da estrada PO-234 entre Laxoso e Augasantas, un vial moi transitado que une o territorio caldelán con Cotobade e que presenta un alto nivel de perigosidade.

Hai case cinco meses que a Alcaldía solicitou unha entrevista coa conselleira de Infraestruturas, Ethel Vázquez, sen recibir resposta. Máis aínda, diante dunha solicitude oficial para a remisión do proxecto, o Consistorio recibiu uns vellos planos do ano 1905. Solicitado novamente o proxecto hai un mes, segue sen recibirse.

O alcalde rexeita este xeito de actuar, que contrasta co envío do proxecto “de oficio” ao veciño Concello de Cotobade. Un exemplo lamentable de partidismo, pois os expedientes administrativos non deberían estar a disposición dos concellos en función da cor política, recalca Andrés Díaz. Parece que hai que lembrarlles que os veciños teñen os mesmos dereitos e merecen o mesmo respecto por parte da Xunta de Galicia na atención das súas solicitudes e reclamacións.

Este bloqueo non é casual, denuncia Díaz, pois prodúcese despois de que o delegado territorial da Xunta, Xosé Manuel Cores, condicionara as obras á cesión dos terreos. O Concello, explica o alcalde, púxose a traballar inmediatamente cos veciños e atopou unha magnífica sensibilidade para asinar as correspondentes actas de cesión. “Debo agradecer a actitude dos afectados, porque todo o mundo entendeu que o Concello de Ponte Caldelas estaba sendo obrigado a substituír á Xunta no proceso de obtención dos terreos para ampliar unha estrada autonómica”, explicou o alcalde. Non obstante, o procedemento é imposible sen dispoñer antes do proxecto e de identificar as parcelas necesarias. De aí o retraso no envío.

O alcalde adianta que nin o Concello nin os caldeláns van permanecer calados diante deste agravio comparativo. O certo, recalca Andrés Díaz, é que a Xunta de Galicia inviste 0 euros en Ponte Caldelas durante este ano 2016, mentres anuncia millóns noutros municipios de menor poboación. En pleno “carrusel preelectoral” do Partido Popular, no que o presidente galego e os seus conselleiros van facendo anuncios por todo o territorio galego, os caldeláns contemplan, con sorpresa, que non teñen nada que ofrecernos. Nin sequera o arranxo dunha estrada perigosa, na que corremos o risco de perder vidas. Os caldeláns non pedimos luxos, subliña.

Hai poucos días o Partido Popular iniciaba en Ponte Caldelas a recollida de sinaturas para confirmar a Núñez Feijoo como candidato á Xunta de Galicia. O acto, celebrado nunha discoteca cando noutros tempos enchían o pabillón, tivo unha discreta afluencia. Especialmente notoria foi a ausencia de moitos caldeláns que noutros tempos apoiaban publicamente ao PP. Quizais, conclúe o rexedor, os responsables deste partido político que durante tantos anos gobernou o municipio deberían pararse a reflexionar o porqué deste fiasco.

PopFeed: El destinatario de correo electrónico especificado está vacío o no es válido. Verifique las opciones y inténtelo de nuevo.

TAMBIÉN LE PUEDE INTERESARlineaazul 1600