O maxistrado ordena que se continúe a tramitación das dilixencias por se os feitos fosen constitutivos dun delito de estafa en concurso con outros de branqueo de capitais e danos

22/04/2025.- O maxistrado do Xulgado de Instrución número 1 de Ourense concluíu a instrución relativa ao presunto hackeo da conta bancaria da Deputación Provincial de Ourense e ordenou a continuación das dilixencias polos trámites do procedemento abreviado, por se os feitos imputados á persoa investigada fosen constitutivos dun delito de estafa en concurso cun delito de branqueo de capitais e un delito de danos. No auto, o xuíz ordena que se lle dea traslado ao Ministerio Fiscal e ás acusacións, se as houbese, a fin de que no prazo de dez días formulen escrito de acusación solicitando a apertura de xuízo oral ou ben o sobresemento da causa, sen prexuízo de que poidan solicitar excepcionalmente a práctica das dilixencias complementarias que consideren imprescindibles para formular a acusación.  

O titular do Xulgado de Instrución número 1 de Ourense apunta no auto como indicios existentes o feito de que o investigado é o administrador único da sociedade titular da conta á que se fixeron as dúas transferencias investigadas, emitidas de forma fraudulenta desde a Deputación Provincial de Ourense, por importe de 89.999 euros e 80.000 euros, ou o atopar no seu poder o resgardo dunha transferencia por importe de 30.000 euros realizada pola devandita sociedade a unha conta de Estonia.

Ademais, fai referencia á documentación bancaria e ás periciais existentes nas actuacións, así como aos diferentes informes elaborados polos axentes instrutores e ao feito de que o investigado comparecese nunha sucursal solicitando un reintegro desde a conta da súa sociedade. Ademais, sinala que acudiu ao banco preguntando polo motivo do bloqueo da súa conta e do retroceso dunha transferencia realizada. O auto non é firme, pois cabe presentar recurso.