O Concello de Nigrán outorgou o mes pasado a licencia de construción a Borgwarner Emissions Systems Spain para edificar o seu gran centro de desenvolvemento no parque empresarial de Porto do Molle, cuxas obras xa comezaron. Este ubicarase nunha parcela da rúa das Pontes de 8.527 m2 cun orzamento previsto de 5.245.320 € aos que se suman 1,17 millóns de euros pola súa compra en marzo de 2023 a Zona Franca, a isto habería que sumar a propia dotación do centro, polo que o investimento total ascenderá aos 12 millóns.
Esta infraestrutura, 'eMobility Advanced Research Center de Borgwarner Emissions Systems Spain', está firmada polo reputado estudo de arquitectura vigués 'Irisarri+Piñera' e está enfocada na investigación de tecnoloxías avanzadas para a mobilidade do futuro, estando subvencionado pola Xunta de Galicia a través da Axencia Galega de Innovación na convocatoria de axudas para a creación de novos centros de investigación empresarial.
"Con esta nova sede de Borgwarner, o parque empresarial Porto do Molle consolídase como un referente en toda España en termos de modernidade, sostibilidade ambiental e deseño urbano, situando ao mesmo tempo a Nigrán como un gran motor económico no Sur de Galicia e un referente mundial en termos de I-D", considera o alcalde, Juan González.
Para a realización desta actividade de investigación, as instalacións contarán con espazos de oficinas e zonas de laboratorios, así como outras dotacións enfocadas á actividade científica e de divulgación, polo que albergarán a persoal da máis alta cualificación (ata 150 postos) e compartirán a súa experiencia con centros tecnolóxicos e a universidade. A previsión é que o eMobility Advanced Research Center conte con 70 profesionais nos 5 primeiros anos de funcionamento, dos cales 40 serán novas contratacións e o resto serán transferencia de persoal investigador actual reconvertido do ámbito de vehículos de combustión ao da mobilidade eléctrica. Os perfís que formarán parte do eMobility Advanced Reseach Center serán na súa práctica totalidade altamente cualificados (PhD, Master, Grade) en especialidades de Electrónica, Telecomunicacións, Informática, Mecatrónica, Física e Matemáticas, entre outras. A estes perfís poderalles dar apoio persoal auxiliar, mantendo unha porcentaxe de alta cualificación por encima do 95%.
O eMobility Advanced Research Center créase como unha entidade aberta que poida colaborar con diferentes organizacións, tales como universidades, asociacións, plataformas tecnolóxicas, centros tecnolóxicos, empresas, así como tamén coa administración pública, co fin de promover proxectos piloto e novas iniciativas conxuntas de investigación. Ademais, a empresa pretende que o centro constitúa un punto de referencia para a realización de actividades de difusión, eventos, showrooms ou xornadas informativas nos ámbitos relacionados coa mobilidade do futuro.
