- A primeira xornada explora os métodos de permacultura para favorecer a infiltración de auga no terreno frente as seca asociadas ao cambio climático
- O proxecto une comunidades galegas e portuguesas para procurar xeitos máis resilientes de xestionar os territorios
Lousame, 20 de outubro de 2024.- Este domingo o mal tempo non impediu o lanzamento do proxecto Erasmus+ “De monte a monte: territorios resilientes”, que unirá durante os o próximos 18 meses a comunidades galegas e portuguesas para botar a andar formas de xestión do territorio máis resilientes frente o cambio climático, incendios forestais e perda de biodiversidade. O proxecto, financiado pola Unión Europea, está coorganizado pola Fundación Montescola (Gz), Verdegaia (Gz) e Veredas da Estrela (Serra da Estrela, Portugal), combinando xornadas práctico-teóricas, formación forestal e visitas de intercambio a ambos os dous lados da raia.
Esta fin de semana a iniciativa xuntou 40 participantes en Froxán, unha comunidade de Lousame que en 2017 foi recoñecida pola ONU como Área Conservada por Pobos Indíxenas e Comunidades Locais (ICCA), para descubrir cómo aplicar as técnicas de permacultura á restauración forestal e hidrolóxica. Nesta primeira sesión, trazáronse liñas de infiltración de auga (coñecidas en inglés como “swale”) nunha zona de forte pendente na que se eliminou o eucalipto e que está por encima dos mananciais que suministran a aldea. O método, que tamén inclúe a plantación de árbores e arbustos autóctonos, permite que a auga de chuvia entre e se reteña no terreno.
O programa da xornada incluíu unha actividade noctura de observación de morcegos organizada pola asociación Morcegos de Galicia así como o espectáculo teatral “Dramón en Froxán”, unha peza da Pequena compañía de nenos enormes para reflexionar sobre a destrucción ambiental do mundo rural.
Esta é a primeira de 10 xornadas de formación coas mans na terra que continuarán até abril de 2026, de par de sesións de inventariado de biodiversidade e intercambios, para descubrir distintas técnicas e experiencias que fortalezan a resiliencia social e ambiental das comunidades rurais. As seguintes terán lugar o 27 deoutubro en Vinhais/Bragança (Trás-os-Montes) e o 16 de novembro no Ribeiro (Ourense). O proxecto está aberto ao público en xeral e as participantes recibirán unha acreditación da formación recibida finalizado o mesmo.
O programa Eramus+
Erasmus+ é o programa europeo de educación, formación, xuventude e deporte para o período 2021-2027 e ten como obxectivo mellorar o desenvolvemento persoal e profesional de todos os cidadáns, reforzar a identidade europea, o crecemento sostible, a cohesión social e a empregabilidade das persoas. Promove o traballo de organizacións no ámbito de asociacións europeas ou internacionais cunha ampla gama de actores públicos e privados e fomenta o intercambio de coñecemento e a innovación nos ámbitos da educación, a formación, a xuventude e o deporte. O proxecto “De monte a monte: territorios resilientes” forma parte da Acción Chave 2 – Parcerías de pequena dimensión (KA-2).
MÁIS INFORMACIÓN:
Contactos:
- Joám Evans, Fundación Montescola: (+34) 622312831 | Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo.
- João Manuel Peres Lijó, Verdegaia: (+34) 627474795 | Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo.
Redes sociais:
Fotografías da xornada:
|
- RSS.-
