Información

Un total de 105 proxectos de toda a provincia veñen de ser aprobados ao abeiro da liña de axudas a entidades para dinamización do galego

Información
XornalGalicia 13 Septiembre 2016 4773 Votos

Ratio: 0 / 5

Inicio desactivadoInicio desactivadoInicio desactivadoInicio desactivadoInicio desactivado
 

Unha liña de axudas que o organismo provincial convocou, a través do departamento de Cultura e Lingua, por primeira vez neste exercicio. Segundo explicou o deputado responsable desta área, Xosé Leal, "o que pretendemos con estas axudas é que sirvan de berce para iniciativas novas e que ao mesmo tempo reforcen proxectos de longo percorrido". Leal salientou especialmente "a diversidade de proxectos que se presentaron, que era un pouco o que pretendiamos, non circunscribirnos só á cultura senón abrilas a outros ámbitos, de xeito transversal, como pode ser por exemplo o sector do comercio". 

O deputado tamén aproveitou para poñer en valor outras actividades do seu departamento coas que, segundo explicou "se complementa a aposta que esta nova Deputación está a facer pola nosa lingua". Mencionou as axudas para servizos lingüísticos e dinamización do galego dirixidas a concellos, a través das cales se apoiaron solicitudes de 36 concellos e dunha entidade menor, e outros eventos como o Correlingua e a colaboración con diversas actividades da Real Academia Galega, e que en total suman 470.000 euros neste exercicio. "Isto vén dar mostra da nosa aposta pola promoción do galego, que ademais é un dos acordos recollidos no pacto de goberno, e coa que tratamos de defender o idioma e promover o seu uso tanto na propia institución como entre a cidadanía, neste caso a través dos concellos e das entidades" sinalou Leal. Tamén anunciou que estas iniciativas a prol da lingua se consolidarán nos vindeiros anos.  

As axudas a entidades para dinamización do galego contemplan catro apartados: Certames literarios, xornalísticos e teatrais; Festivais de música; Accións de fomento do galego na cultura, comercio e novas tecnoloxías; e Recoñecementos a persoas e colectivos que aposten pola lingua. 

No primeiro apartado foron aprobados 24 proxectos por un total de 55.124,70 euros (o 20% do total). Nesta liña, Leal destacou especialmente o apoio que recibiron certames xa consolidados e de gran implantación na provincia como son o XXX Festival da Poesía do Condado que recibiu unha achega de 7.129 euros, a XXXIII Mostra de Teatro Cómico e Festivo de Cangas con 7.000 euros, e o Certame literario 'O Grelo' con 6.379 euros.  

No apartado de Festivais de Música apoiáronse 31 proxectos por un importe total de 85.840,71 euros (o 31% do total). Neste eido, o deputado destacou dúas iniciativas concretas. Dunha banda, o Armadiña Rock con 8.257 euros, por incluír un cartel de grupos nos que predominou a música en galego e por realizar todas as demais actividades paralelas da programación e a promoción en galego. En segundo lugar, destacou a adaptación a galego do Concerto de Carmina Burana, realizada pola Asociación Cultural Musival de Valga, para o que se lle concederon 6.16o euros. "Á marxe da axuda económica, gustaríame destacar a importancia de adaptar a evolución dun clásico do latín medieval ao galego e que non vai quedar só na provincia, xa que unha vez que o teñen deseñado poden promovelo por todo o país".

No terceiro apartado o número de proxectos ascende a 44 e o importe total a 126.445,02 euros (o 46% do total). Nesta liña salientou especialmente os proxectos de divulgación etnográfica e histórica, como o documental sobre o Entroido de Cobres, Vilaboa, con 8.257 euros, e os proxectos de dinamización da lingua presentados por entidades empresariais e do comercio do Morrazo, Porriño, Redondela, Vigo e Vilagarcía, que suman 43.688 euros. "Predominan as campañas para promover a compra en galego e iso parécenos especialmente interesante porque o sector do comercio e da industria ten un gran impacto sobre a sociedade, sobre todo o pequeno comercio, pola súa proximidade coa veciñanza da cada lugar". 

Por último no apartado dedicado a recoñecementos a persoas e colectivos foron aprobados 6 proxectos por 7.588,52 euros (o 1% do total). Nesta liña todas as iniciativas xiraron ao redor da figura de Manuel María, persoeiro ao que se lle dedicou este ano o Día das Letras Galegas. Neste apartado destacou o concerto didáctico músico poético realizado pola Escola de Música de Vilaboa nos centros educativos deste concello. 

Otros articulos relacionados.....
esafsqarhyazeubebgcazh-CNzh-TWhrcsdanlenettlfifrglkadeelhtiwhihuisidgaitjakolvltmkmsmtnofaplptrorusrskslswsvthtrukurvicyyi