Información
Galicia

O 5% da poboación adulta en Galicia implicouse en actividades emprendedoras o pasado ano

Información
14 Diciembre 2018 188 votos
1 1 1 1 1 1 1 1 1 1

A presentación tivo lugar nunhas xornadas dedicadas a analizar o estado do emprendemento en Galicia. Foto: Servimav-USC

A percepción de oportunidades e as vías de financiamento continúan a ser os factores clave á hora de dar comezo a novas iniciativas de negocio, segundo os datos recollidos no Informe GEM Galicia 2017 que se presentou este xoves na Facultade de Ciencias Económicas e Empresariais da USC.


O ano 2017 supuxo a consolidación do emprendemento en Galicia, cunha Taxa de Actividade Emprendedora (TEA) que se sitúa no 5,06% fronte ao 3,99% de 2016. Son datos recollidos no informe executivo Global Entrepreneurship Monitor (GEM) configurado por un equipo de investigadores da USC froito dun convenio de colaboración co Instituto Galego de Promoción Económica (IGAPE) e a Federación Galega de Xoves Empresarios (FEGAXE).

Durante a presentación do informe, a investigadora da USC e directora técnica do proxecto en Galicia, Isabel Neira, explicou que estes datos se traducen nunha “consolidación da actividade emprendedora que vén impulsada con novas xeracións, maioritariamente entre 25-44 anos e con maior formación tanto universitaria, como de modo crecente da FP”.

Neira fixo referencia a que este crecemento “foi liderado pola poboación universitaria (7,99%) e ten a súa base nas iniciativas que contan entre 3 e 42 meses de vida”. Unha positiva evolución tamén observada nas iniciativas consolidadas cunha taxa do 11,20%, a segunda máis elevada das comunidades españolas, e das cales o 12,39% son de carácter innovador.

O informe reflicte tamén o incremento da porcentaxe de mulleres emprendedoras entre a poboación galega (un 4,52% en 2017). Destaca especialmente o aumento do número de emprendedoras potenciais xunto co descenso da súa taxa de cesamento de actividades, menor que no caso dos homes (o 1,6% de mulleres abandonan as iniciativas fronte a un 2,1% de homes). Este factor, segundo explicou Neira, “contribúe a igualar a proporción de homes/mulleres nas iniciativas consolidadas, dado que no momento de dar o paso a crear iniciativas, factores como o temor ao fracaso frean as primeiras fases do proceso”.

O aproveitamento dunha oportunidade de negocio constitúese, no 60% dos casos, como a principal motivación para emprender, aínda lonxe do 80% que alcanzaba antes da crise económica. Pola contra, o financiamento é o principal problema para a posta en marcha de novos proxectos segundo o 37% dos expertos consultados, se ben este obstáculo foi perdendo importancia dende o 50% dos anos pos-crise. Este factor constitúe un importante elemento de abandono de iniciativas cando o capital é baixo; en concreto, nas de menos de 20.000 euros a taxa de abandono é do 46%.

GEM
GEM é un observatorio internacional cuxo obxectivo é analizar e avaliar o impacto da actividade emprendedora no crecemento económico como factor determinante para o desenvolvemento e o benestar das sociedades. Un proxecto liderado en España polo Centro Internacional Santander Emprendemento (CISE) ao que Galicia se sumou en 2005 cun equipo configurado por investigadores da USC, o IGAPE e a FEGAXE.

lineaazul 1600

Otros articulos relacionados.....


Esquema dos conos proxectados durante unha eclipse. Foto:...

PECHADO O CUARTO DE CONTENCIÓN
Días antes de que no Obelisco...

Esta mañá presentouse na sala de reunións da casa do Concello...

El próximo domingo 20 de enero el Club Waterpolo Pontevedra se...