O festival de Vilaxoán afrontra hoxe o seu “día grande” con todas as entradas vendidas e unha oferta de música de 15 horas ininterrumpidas, nas que subirán aos seus dous escenarios 14 bandas, ás que hai que sumar tres sesións desa incombustible animadora que é A Duendeneta. Carlos Crespo e Kris K Dj serán de feito os primeiros en facer soar hoxe a música no recinto do Revenidas, trala apertura de portas ás 11 horas. A Duendeneta fará ademais outras dúas sesións, ás 13.45 e ás 21.20 h.

O Revenidas conta o sábado con dúas presenzas internacionais, a dos italianos Talco e a dos bosnios Dubioza Kolektiv. Talco despezarán ao persoal ás doce e media do mediodía coa súa imbatible combinación de ska e punk. Non lle anda á zaga en canto a axitación e enerxía a proposta doutros vellos coñecidos do Revenidas, Dubioza Kolektiv, coa súa fusión de hip-hop, reggae, dub, rock e folclore de Bosnia.

Sobresae tamén presenza de El Kanka, un dos músicos españois máis aclamados e solicitados e un artista desexado polo Revenidas dende hai xa uns cantos anos e ao que por fin se poderá ver ao carón do mar de Vilaxoán a partir das 20 h.

O Revenidas conta o sábado cunha notable e salientable presenza de grupos galegos. Comezando por Tanxugueiras (17.30 h), a formación galega que a día de hoxe máis público é capaz de congregar, como o demostrou no Coliseum da Coruña. Tamén actuará o grupo galego que seguramente máis concertos ten feito neste 2024, The Rapants (15.20 h). O sábado tamén subirán ao escenario dúas mulleres que representan ao tempo o pasado o presente e o futuro na música galega, Guadi Galego (18.50 h) e Catuxa Salom (11.30 h), que por certo ten antecedentes familiares en Vilaxoán. A presenza galega complétase con Loita Amada (03.00 h), o novo proxecto de Jásper; e Rebeliom do Inframundo (01.50), que ofrecerán un concerto especial no que participarán como convidadas Tanxugueiras, Law, Vértebras, Nadie González, Cousxs, Treintañeras Cañeras e Sonriot, para rematar cunha sesión fin de festa a cargo de La Yaya Dj.

Outros concertos destacados do sábado son os de Los Niños Jesús, o grupo de versións que lidera o xornalista Jordi Évole; Xavi Sarrià, o que fora líder dos míticos Obrint Pas, que ofrecerá no Revenidas o seu derradeiro concerto en Galicia antes da súa retirada; os valencianos Lágrimas de Sangre, que tamén anunciaron este ano a súa despedida; e os tamén valencianos La Fúmiga, unha das últimas sensacións da música festiva levantina.

O PROGRAMA DO DOMINGO

Sempre se conta que o festival Revenidas naceu a partir da sardiñada popular que cada ano se celebraba en Vilaxoán. Non é por tanto de estrañar que esta actividade siga a ser considerada como o epicentro do festival.

A sardiñada Revenidas-Turismo Rías Baixas desta edición terá lugar o domingo 15 no parque de dona Concha e con entrada libre, como todas actividades desa xornada. A partir das 13:30 horas poderanse degustar as que posiblemente son as mellores sardiñas do mundo.

Uutra das actividades emblemáticas do festival Revenidas é a celebración o domingo da Gala de Circo Solidaria. A deste ano dará comezo ás 17.30 horas e estará dedicada en solidariedade co pobo palestino.

A Gala acollerá unha festiva sucesión de espectáculos de maxia, clown, música e circo protagonizados por varios dos nomes máis destacados da escena galega dos espectáculos de rúa. É o caso, por exemplo, de Peter Punk, todo un clásico desta gala; da actriz e narradora compostelán Cris Collazo; de N+1, o proxecto persoal do clown Alfredo Pérez Muíño; da actriz, trapecista e bailarina coruñesa Sue Moreno; do Mago Noel, que presentará o seu espectáculo Que curioso!; e do dúo Jack Jhonson e Jhon Jackson, formado polo artista circense David Varona e o músico e malabarista Jonathan Valencia.

O escenario do Revenidas acollerá o domingo dous concertos, xa pola tardiña. Ás 19.45 h será a quenda de Caamaño & Ameixeiras, o dúo que está a resituar a nosa música de raíz enfatizándoa cun profundo coñecemento da tradición. O derradeiro concerto desta edición do Revenidas correrá por conta de De Ninghures (21 h), a banda revelación do “tradi” galego deste 2024.

Oo domingo tamén haberá tres concertos a bordo do barco do xeito ‘Chasula’; Monoulious Dop (13 h), Sés (15 h) e Fillas de Cassandra (17 h). As entradas para ambos están esgotadas,

A xornada do domingo complétase no musical coas actuacións de Os Terribles de Arousa (12h), Uxía Lambona e A Banda Molona (13h) e a Mekanika Rolling Band (15.30h).

A entrada para todas as actividades e concertos do domingo é de balde.

HORARIOS

INFO GRUPOS DOMINGO

CAAMAÑO & AMEIXEIRAS

Sabela Caamaño (acordeón cromático) e Antía Ameixeiras (violín e voz) conforman este dúo que ven a resignificar e actualizar os códigos da música de raíz, elevando a mística e a profundidade do seu son e levando a sonoridade da tradición galega e ibérica á virulencia de planos de músicas que se saen das marxes dos xéneros. E fano cunha linguaxe propia e única, con composicións e arranxos persoais e vivos que manteñen a esencia do popular incorporando recursos contemporáneos e situando a emoción en primeiro plano.

DE NINGHURES

O que posiblemente é o grupo revelación en Galicia neste 2024 non podía faltar no Revenidas. Chegan da man dos Concertos Vibra Mahou. Eles defínense coma uns rapaces dos anos 90 que creceron escoitando a grupos como Berrogüetto, Milladoiro e infinitas cancións de infinitos estilos musicais. Por iso, defenden a música feita de raíz e a creación contemporánea que pon en valor a tradición. Teñen os pés na terra pero a súa mirada é completamente global. O seu hit, Morena, é a mellor proba disto.