Onde está a promesa do conselleiro de Medio Ambiente de non autorizar máis aproveitamentos no Sil, e moi especialmente este? E este o "peso" que ten a administración galega en Madrid para defender as nosas xoias naturais?

ALEGACIÓNS DE ADEGA AO PROXECTO AGORA APROBADO

1.- Que o citado aproveitamento hidroeléctrico “Santo Estevo II” afecta ao LIC (Lugar de Interese Comunitario) Canón do Sil, pertencente á Rede Natura 2000 e polo tanto suxeito á Directiva 92/43/CEE relativa á Conservación dos Hábitats Naturais e da Flora e Fauna Silvestre, tamén coñecida como Directiva Hábitats.

2.- Que o citado aproveitamento debe estar sometido á realización de Estudo de Impacto Ambiental en base ao punto anterior e ao Real Decreto 1302/1986 de Impacto Ambiental no seu Anexo II, Grupo 4, apartado C.

3.- Que a apertura dos túneis-galería necesarios para realizar o aproveitamento producirá grandes cantidades de cascallos e entullos que afectarán gravemente á conservación do citado LIC “Canón do Sil” así como os efectos do aproveitamento do caudal ecolóxico para o turbinado poden ter graves efectos sobre multitude de especies e hábitats protexidos, tendo estas obras carácter INCOMPATÍBEL coa función de Conservación que debe prevalecer en virtude do interese público.

4.- Finalmente e debido aos aspectos anteriormente detallados ADEGA (Asociación para a Defensa Ecolóxica de Galiza) solicita a retirada do proxecto en base ao seu grave impacto ambiental, social e a carencia de interese público das obras, xa que os supostos beneficios económicos que conleva para a empresa promotora serían moito menores que os prexuizos que causaría á sociedade.
Engadir que este aproveitamento fora rexeitado cun informe negativo da Dirección Xeral de Conservación da Natureza da Consellaría de Medio Ambiente e Desenvolvemento Sostible por afectar a un espazo da Rede Natura.

Interese da UNESCO
Os Canóns do Sil integran un importante recurso xeolóxico que foi seleccionado para o proxecto “Geosites” dentro do traballo que leva a Unesco para inventariar aqueles lugares que integran o patrimonio xeolóxico español (144 lugares propostos) que, pola súa importancia, proporá o Instituto Xeolóxico e Mineiro de España.

Enviar esta noticia a: