.- “Os empresarios mozos tedes garantido un rol preferente no sistema produtivo de Galicia, no novo modelo de crecemento económico e no conxunto das medidas de apoio que está a poñer en marcha este Goberno. Vós sodes actores principais da nova realidade galega”, son palabras do presidente da Xunta, Emilio Pérez Touriño, durante a súa intervención no acto de entrega do XIII Premio xoven empresario do ano, organizado pola Asociación de Jóvenes Empresarios de Pontevedra (AJE Pontevedra). O máximo mandatario galego subliñou que a Galicia produtiva e emprendedora ten garantido o relevo xeracional e a continuidade “ao máis alto nivel”, afirmou, tal e como demostran os centros de incubación de empresas existentes na comunidade e os parques empresariais de maior tradición.

Nesta liña, Pérez touriño avanzou que o vindeiro xoves terá lugar en Santiago o III Día Galego do Emprendedor, froito da cooperación entre o Instituto Galego de Promoción Económica (Igape) e o Ministerio de Industria, Turismo e Comercio. O obxecto deste encontro é analizar as claves para o nacemento de empresas desde a innovación e a competitividade.

“A Xunta de Galicia e máis o Goberno de España temos o convencemento de que iniciativas como a que consolida o Día Galego do Emprendedor son básicas para estimular a creación de empresas, para potenciar o autoemprego, para impulsar a competitividade, para fomentar o uso das novas tecnoloxías e tamén para propiciar redes de traballo conxunto entre as universidades e as empresas”, sinalou ao respecto Pérez Touriño.

Nesta liña, o presidente galego avanzou, ademais, que nas vindeiras semanas se sumará outra ferramenta de peso para acadar este obxectivo, coa presentación do Plan de competitividade, froito do Acordo Social e polo Emprego, que se converterá en “guía do noso proxecto económico”, indicou.

O mandatario autonómico resaltou tamén a importancia de iniciativas postas en marcha polo Executivo que preside, como o Plan galego de I+D+i, dotado cun orzamento de 800 millóns de euros ata o ano 2010. Unha dotación que, segundo explicou Touriño duplica o esforzo orzamentario e permitirá que nesta data de referencia, o 1,5 po PIB galego se destine á investigación.

Acceso aos créditos e garantir financiamento
Na súa intervención, o presidente da Xunta referiuse á necesidade de “suavizar” o acceso ao crédito alcanzable e o financiamento lixeiro de cargas no actual momento de desaceleración económica xa que, “preservar a cultura emprendedora é o mellor xeito de blindar o noso territorio á desaceleración”, considerou.

Por iso, explicou, o Goberno que preside acaba de asinar un convenio entre a Consellería de Economía e o ICO que habilita 475 millóns de euros para o investimento nas pemes galegas. Ademais do incremento de recursos, este acordo permite mellorar as condicións de cada operación, dado que o tipo de xuro situarase no entorno do 2 por cento.

Entre os apoios directos do Igape e de Xesgalicia, e os compartidos con institucións coma o ICO, o propio Goberno de España e o Banco Europeo de Investimentos, o financiamento empresarial, segundo salientou Touriño, mobilizará na comunidade 700 millóns de euros, o que se traducirá nun investimento inducido por importe de 2.000 millóns.

Xunto con isto, recoñeceu que lle compracería que o colectivo de emprendedores galegos fose un dos principais destinatarios do programa de axuda á internacionalización. “Esta liña de apoio, sumada á de modernización de empresas, ten neste exercicio unha asignación superior aos 180 millóns de euros”, afirmou. Igualmente, o titular do Goberno galego referiuse á reforma do imposto de sucesións e doazóns como un importante e xusto instrumento para que os negocios familiares estean en mellores condicións de competir.


Novas empresas en Pontevedra
O presidente da Xunta destacou que Galicia está a ser un dos territorios que está preparado para facer fronte ao escenario de desaceleración. Puxo como proba o feito de que nos dous primeiros meses de 2008 naceran en Pontevedra preto de 500 sociedades, a mesma cifra que no arranque do 2007 e un número moi superior ás dos anos 2004 e 2005.

De feito, segundo indicou, nos dous últimos anos o 40,6 por cento das sociedades galegas de nova constitución naceron na provincia de Pontevedra. Así, en 2006 e 2007 fixaron o domicilio fiscal nesta provincia un total de 5.500 novas empresas, case un 11 por cento máis que no bienio anterior.

O presidente da Xunta destacou tamén o progresivo acceso da muller galega ao mundo laboral. Salientou que no ano 2007 incorporáronse 12.400 mulleres que estaban no paro; que no último bienio 3 de cada 4 traballadores que atoparon emprego foron mulleres e que desde o ano 2005 a taxa de emprego feminino caeu en 5 puntos porcentuais.

Por último, Pérez Touriño rematou a súa intervención felicitando aos premiados e a todos os candidatos e agradecendo a AJE de Pontevedra a oportunidade de participar nun acto con tanta xente moza.

Enviar esta noticia a: