Promotora Orxeira pretende revalorizar no mercado os produtos elaborados con variedades do millo galego, polo que está a investigar técnicas para o procesado e a conservación do gran. Coa colaboración da Misión Biolóxica de Galicia, cultiva millos ecolóxicos cos que estudará as técnicas para o envasado, posibilitando novas liñas de negocio dirixidas cara a pequenas empresas e consumidores.

A novidade do proxecto radica, segundo Arsenio Landa Velón, investigador principal do mesmo, en tres factores: na profundidade do estudo sobre a conservación do millo, no feito de utilizar técnicas ecolóxicas para o seu cultivo e en que o estudo non soamente se orienta á investigación senón que ten unha vocación industrial.

Este proxecto conta con financiamento da Consellaría de Innovación e Industria xa que lle foi concedida unha axuda de 40.124 euros dentro do programa de Tecnoloxía da Alimentación do Plan Galego de I+D+i 2006-2010 (incite).

O traballo é continuación dunha investigación anterior, apoiada tamén pola Xunta de Galicia, para o estudo dos millos autóctonos de Galiza. No transcurso deste proxecto, seleccionáronse, debido ao seu alto valor agronómico, catro variedades de millo coas que comezar unha liña de produción. Os lugares de cultivo destas variedades son Sarreaus, na provincia de Ourense, e Tui, Rebordáns e Meiro, na de Pontevedra. Sen embargo, para a elaboración de produtos e a súa distribución comercial era necesario traballar sobre os métodos para o tratamento da materia prima e para a conservación.

Co proxecto actual, Orxeira responde a esta necesidade de deseñar un sistema de procesado e de envasado de millo e dos produtos derivados, que garanta a conservación da calidade, así como a saúde do gran e a seguridade alimentaria. Despois da primeira fase, na que se cultivou millo seguindo as técnicas da comarca da Baixa Limia e se obtivo semente das variedades coas que se fará o ensaio, o seguinte paso será acometer as primeiras probas de conxelación ultrarápida.

OPTIMIZAR A PLANTACIÓN E A CONSERVACIÓN

A investigación comeza nas rutinas do cultivo, xa que se estudarán a influencia da variedade usada, da data de recollida, das condicións ambientais e do método de conservación na calidade e na saúde do gran. Para a eliminación de pragas, compararanse diversas temperaturas e tempos de conxelado e diversos métodos de envasado. Actualmente, estúdanse tres opcións para a conservación do gran: facelo de xeito tradicional en canastros, conservalo en cámaras frigoríficas ou envasalo ao baleiro despois dun proceso de conxelación. A análise dos resultados de todas estas variables servirá para definir o modelo.

No proxecto, a Misión Biolóxica de Galicia deseña os experimentos, analiza os datos e proporciona a semente necesaria para iniciar o traballo. Á empresa correspóndenlle os traballos de cultivo, recolleita e procesamento de mostras. A interpretación dos resultados será unha tarefa común entre as dúas entidades, que tamén traballarán de xeito conxunto na difusión das conclusións entre os agricultores, as empresas agroalimentarias e a comunidade científica.

SINGULARIDADE DA GASTRONOMÍA GALEGA

Os responsables do proxecto sinalan que o obxectivo é que produtos que constitúen unha singularidade da gastronomía galega, como son o pan de millo, a boroa, as empanadas, etc, poidan ser fabricados e comercializados con criterios de calidade e de rendibilidade. Ademais, consideran que a produción de millo autóctono para o consumo humano en condicións de agricultura ecolóxica é unha alternativa viable para “paliar o progresivo abandono das explotacións tradicionais”.

Outro valor engadido dos alimentos baseados en millo é que este cereal carece de glutenina, polo que pode ser consumido por persoas intolerantes ao glute que deben seguir unha dieta específica na que eviten outros cereais.

Promotora Orxeira está difundindo as experiencias e os primeiros resultados do proxecto mediante a asistencia a congresos e no espazo www.elmaiz.org. Segundo Arsenio Landa, a intención é que empresas do sector agroalimentario galego “se beneficien desta experiencia”. “Desexamos que se recuperen os produtos tradicionais da cociña galega feitos con millos autóctonos, que son os que garanten mellor calidade”, explica.

Enviar esta noticia a: